— 67 —
berlakoe tiada mengarti itoe bahasa, ia djawab dalem satoe roepa bahasa separo Frans dan separo Vlaamsch, tapi kadang kadang ia kaloearken sala satoe perkata’an, hingga Raoul dapet doega, ia ada bangsa apa, maka lantes ia kata:
„Non siete Spagnuolo, non siete Tedesco, siete Italiano“ (Kau boekan orang Spanjol, kau boekan orang Duits, kau ada saorang Italiaan).
Itoe orang badannja bergerak sedikit dan gigit bibirnja.
O! itoe bahasa akoe mengarti,“ kata toean prins, „dan Kerna ia ada saorang Italiaan, akoe nanti preksa sendiri padanja. Banjak trima kasi burggraaf,“ toean prins kata poela dengen tersenjoem, „dari wates ini waktoe akoe angkat kau djadi akoe poenja djoeroe bahasa.“
Tapi itoe orang tiada maoe mengarti bahasa Italiaan, djoega ia tiada soeka menjaoet apa ditanja padanja, ia tiada taoe siapa adanja jang djadi kapala dari angkatan prang Spanjol, tiada taoe brapa besarnja itoe angkatan prang dan tiada taoe djoega dengen maksoed apa moesoe dateng deket itoe tempat.
„Baek,“ kata toean prins jang dapet kenjataan, itoe orang tiada soeka bitjara, „ini orang didapetken koetika ia memboenoe dan merampok, boeat itoe perkara ia moesti ditembak mati; ada djalan boeat ampoenken ia poenja sala, tapi ia tiada soeka bitjara, bawa ini orang di loear dan lantes djalanken itoe hoekoeman padanja.“
Moekanja itoe orang djadi poetjet; doea soldadoe jang baroesan soeda bawa ia masoek lantes seret ia kaloear, sedeng toean prins lantes bitjara pada maarschalk de Grammont, sebagi ia soeda loepa sama sekali itoe perkara.
