GANDJARAN JANG PANTES
9
„Kaoe baroe poelang, Hok." kata saorang prempoean toea jang sedeng djaitin satoe badjoe jang petjah.
„Bener, iboe."
„lni hari akoe tida poenja makanan apa-apa boeat kaoe, Hok” kata itoe njonja toewa, „tadi akoe baroe bajar sewa roemah anem roepie. Akoe poenja oewang tjoema tinggal bebrapa cent sadja. Tida ada tjoekoep oewang boeat beliken kaoe ikan asin atawa saboetir telor, boeat kaoe makan."
„Tida apa, iboe, kata itoe orang moeda sambil taro ia poenja boekoe-boekoe di satoe medja ketjii jang soeda rejot, „nasi bersama garem poen ada tjoekoep enak boeat akoe. Iboe tida perloe iboek: doaken sadja soepaia ini malem akoe bisa dapet redjeki iebih besar."
Itoe prempoean toea memandang pada poetranja dengen sorot mata jang mengandoeng rasa katjinta'an. la gojang-gojang kepala dan laloeh tinggalken pakerdja’annja. Samentara itoe, itoe orang moeda boeka ia poenja pakean loear, hingga ia tjoema memake satoe badjoe kaos jang soeda penoeh tembelan dengen satoe tjelana koetoeng jang djoega boekan baroe lagi.
Sesoedahnja iboenja sendokin ia nasi, itoe orang moeda makan dengen roepa bernapsoe sekali.
Seabisnja bersantap, ia pegang kombali boekoenja dan sampe djam ampat sore ia bekerdja dengen tida brentinja.
„Sekarang akoe maoe tjari pakerdja'an, iboe," kata ia sambil berpakean. „Harep sadja ini malem poenja pengasilan aken ada begitoe besar, hingga besok akoe boleh dapet sapotong ikan asin atawa saboetir telor.” kata ia sambil tertawa.
Iboenja mengelah napas.
