GANDJARAN JANG PANTES
25
III
DALEM PESTA.
Waktoe jang ditoenggoe-toenggoe, achirnja sampe djoega. Gedong itoe sekola, di mana Sien Nio sekola dirias dengen bagoes sekali. Berpoeloeh lampions jang berwarna ada digantoeng di bebrapa roeangan dan membri penerangan jang loear biasa di waktoe malem. Dedaonan jang ditoesoek dengen tali melingker-lingker dari satoe ka laen djoeroesan.
Pada djam toedjoeh malem itoe pesta dimoelai. Ampir semoea moerid itoe sekola dateng berkoempoel boeat bersoeka-soeka, baek jang loeloes atawapoen jang tida loeloes dalem oedjian, jang naek atawa tida naek klas. Moerid-moerid lelaki kebanjakan memake pakean item; smoking dan colbert costuum banjak tertampak. Moerid-moerid prempoean memake pakean jang paling bagoes jang masing-masing ada poenja. Sebagian lagi memake kedok dan pake pakean loear biasa dan baroe sadja masoek dalem roeangan pesta, soeda moelai kasi denger soeara tertawa dan bertreak-treak dengen rioeh sekali.
Satoe pesta jang gilang goemilang. Pertoendjoekan tooneel, moesiek dan laen-laen ganti berganti, dan achirnja orang berdansa.
Tapi sedeng sebagian orang-orang moeda itoe girangken hati dengen berdansa tida koerang djoega jang dengen alesan kepanasan kaloear dari itoe roeangan dan masoek dalem pekarangan gedong, atawa pergi lebih djaoeh lagi, mentjari tempat sepi, di mana marika bisa berdiam dengen tida terganggoe. Antara orang-orang jang termasoek dalem golongan blakangan ada keliatan djoega doea gadis, jang kita
