GANDJARAN JANG PANTES
27
Si Hok bersenjoem.
„Di ini waktoe akoe boekan anak sekola, boekan si Dogol jang kaoe kenal, nona, tapi akoe ada satoe knecht taxi jang moesti tjari moeatan."
Sien Nio ampir tida maoe pertjaja koepingnja sendiri waktoe denger itoe katerangan. la djadi bengong terlongong-longong, sampe achirnja ia denger si Hok menanja poela:
„Apa akoe boleh toeloeng kaoe, nona?"
„Ja, djikaloe kaoe soeka, tjobalah toeloeng tjari di mana adanja Gwat Nio dan Liong Nio. Marika kaloear dari roeangan pesta dan soeda ampir satoe djam marika tida balik, tinggalken akoe sendirian di sana. Apa kaoe soeka toeloeng tjari marika dan kamoedian anter ka akoe poenja auto, di mana akoe nanti menoenggoe?"
„Dengen segala senang hati, nona, tapi apa kaoe sendiri soeda dapet ketemoeken kaoe poenja auto menoenggoe di mana?"
„Belon."
„Marilah akoe anter kaoe," kata si Hok, „akoe taoe itoe kandara'an berada di mana."
la persilahken Sien Nio djalan doeloean dan ia sen diri menganter. Tida lama kamoedian marika soeda sampe dan Sien Nio naek di autonja.
„Kaoe toenggoe sadja di sini," kata si Hok, „akoe nanti tjoba tjari sampe dapet kaoe poenja doea soedara misan."
Si Hok tida oesa pikirin ka mana itoe doea gadis telah pergi, kerna ia soeda taoe, di mana marika berada. Tempo Liong Nio dan Gwat Nio kaloear dari pekarangan itoe sekola, marika ada diliat oleh si Hok jang kamoedian dapet liat marika masoek dalem itoe park. Ka itoe tempat djoega ia toedjoeken tindakannja.
