34
TJERITA ROMAN
merasa bertrima kasi pada si Hok, tapi djadi semingkin tida soeka pada itoe djedjaka. Bebrapa kali Sien Nio tjoba bitjaraken poela itoe kedjadian, tapi saben kali baek Gwat Nio, maoepoen Liong Nio, dengen tjara tjerdik sekali toedjoeken pembitjara'an ka laen djoeroesan.
Begitoelah, itoe kedjadian di itoe malem boeat Sien Nio ada djadi pokonja perhatian lebih besar boeat dirinja itoe djedjaka miskin. Bebrapa malem lamanja itoe gadis poenja pikiran selaloeh penoeh dengen doega-doega'an jang berhoeboeng dengen dirinja si Hok.
Achirnja sampelah itoe waktoe jang baek Gwat Nio, maoepoen Liong Nio masing-masing berlaloeh dari Bandoeng. Itoe waktoe ada vacantie, hingga itoe doea gadis balik poelang ka roemahnja marika poenja orang toewa. Sien Nio poen pergi dari Bandoeng. Bermoela ia toeroet Liong Nio, di roemah siapa ia berdiam bebrapa hari lamanja. Kamoedian ia teroesken perdjalanan ka laen-laen tempat. la berada dalem waktoe mengaso dan boeat plesir ia tida kakoerangan oewang. Tapi aneh sekali, di waktoe sedeng menampak kagirangan, di waktoe berkandara'an auto sambil memandang ketjantikannja alam, kadang-kadang dengen sakoenjoeng-koenjoeng ia djadi inget pada ia poenja kawan sekola jang miskin, jaitoe si Hok. Dalem waktoe begitoe mendadak itoe gadis bisa djadi sanget pendiam, hingga sesoeatoe orang jang perhatiken betoel padanja, nistjaja aken mendjadi sanget heran. Pengrasa'an jang haloes memang gampang sekali tergerak, baek lantaran meliat satoe kedjadian, atawa lantaran datengnja pikiran jang mendadak, seperti djoega pekakas jang haloes lantes tjatet sesoeatoe perobahan jang membikin ia bekerdja, maskipoen
