96
TJERITA ROMAN
kenjatahan, bahoea itoe tempo-bagoes, jang ia soeda lama sekali impihken, sekarang gapein ia.
Brapa seconde blakangan, kita liat John soeda rangkoel dirinja Gretha jang njata tinggal manda sadja.
Achirnja, itoe telegram jang John pertama pikir bakal bisa mengasih kasoedahan getir, telah membawa ka-satoe tempat dari kagirangan dan kaberoentoengan jang tida terhingga.
Di dalem moesin semi, di atasnja satoe kreta-api, orang menampak John dan Gretha lagi bikin iapoenja honeymoon.
Sembari bersenjoem John bisikin istrinja: „Brangkali Toehan jang maha moelia soeda kirim itoe telegram boeat kau, istrikoe jang manis.”
Gretha memanggoet seraja oempetken satoe meseman, dan berbareng itoe toendoeken iapoenja kepala, dari mana orang bisa mengintip iapoenja paras jang brobah djadi merah dengen pelahan lantaran kemaloean.
„Boleh djadi sekali," achirnja ia mendjawab doega dengen soeara pelahan.
Sampe di itoe koetika Gretha masih belon mendoesin, bahoea sang soeami sabenernja telah mengatahoein iapoenja resia. Oleh kerna John telah beroentoeng bisa boedjoek pada Directeur dari postkantoor boeat hoendjoeken ia liat itoe origineel formulier dan itoe telegram jang ia tida pernah kirim, tapi soeda membawa iaorang ngalamken itoe kaberkahan.
