— 1152 —
rasaken teramat sanget.
Toean Morrel poelang di roemahnja dan bernanti disana saäntero malem dan pada besoknja, ija tida trima kabar satoe apa. Sasoedanja dia bernanti doea hari lamanja, waktoe dia poenja kahendakan aken pergi karoemannja Notaris, toean Deschamps, pada djam 10 pagi, dia trima dengen post satoe soerat ijang dia berasa pasti ada dari Valentine, biarlah dia belon taoe liat toelisannja.
Srenta dia boeka itoe soerat, lantas dia batja, beginilah boenjinja:
,,Begimana djoega kita soedah menoempahken aer mata, begimana djoega kita bermoehoen dan bersembah, semoea pertjoema. Kemaren sampe doewa djam lamanja, kita soedah bersembajang dalem gredja Saint Philippe di Roule dan bersoedjoed pada Allah ijang Maha koewasa meminta doá slamat; begitoe djoega Allah tida mendengarken itoe, seperti djoega manoesia, tida maoe mendengarken, maka ini malem djam 9 soedah di tentoeken aken taro tanda tangan itoe soerat perdjandjian menika. Kita tjoema ada satoe perkataän, seperti kita tjoema ada poenja satoe hati djoega, Morrel, maka ini perkataän kita soedah kasi pada kaoe, dan kita poenja hati sekarang kaoe poenja. Makalah nanti malem pada djam sembilan liwat saperapat di hek kebon, dimana kita orang soedah ketemoe itoe malem.
Kaoe poenja istri.
,,Valentine de Villefort."
N. B. Kasianlah! kita poenja nénéh sakitnja lebih keras kemaren ijalah demem sanget, ini hari ijalah seperti orang gila.
Kaoe boekantah soenggoeh tjinta pada kita, Morrel, aken
