— 1157 —
pangsan di antara djalanan, sebab hilang kakoewatannja, maka kaloe betoel begitoe dia berpikir kasalahannja sendiri, ijang dia tida lantas membri pertoeloengan, sampelah kahendakannja tida bisa kedjadian.
Pikirannja toewan Morrel begitoe keras, sampe kamoedian seperti dia liat di gelap ada satoe badan dengen pakean poetih terbaring di tanah, dan seperti di dengar soewaranja orang ijang bersesambat.
Sekarang dia dengar lotjeng poekoel djam setengah sebelas, maka hatinja mendjadi lebik koewatir dan matanja berasa soeram. Dia tida bisa tahan lagi hati napsoenja, maka dia berlontjat dari tembok, masoek dalem kebon. Betoel dia berasa ijang dia soedah memboewat nal ijang tida halal aken berlontjat tembok, masoek di dalem kebonnja orang, tetapi apa boleh boewat, dia soedah ada di sitoe dan dia tida bisa tahan lagi hati napsoenja. Disitoeh dia dapet liat roemahnja toean de Villefort tida di terangken, tjoema di kamarnja njonja de Saint Méran terpasang satoe lampoe, tetapi tida begitoe terang, maka inilah menambahken kakoewatirannja toean Morrel dan berasalah ijang di dalem itoe roemah tentoe soedah kedjadian hal ijang ngeri. Tida lama dia dengar soewaranja doea orang bitjara, maka dengen sigra dia semboeni di blakangnja poehoen besar, aken bisa mendengarken bitjaraännja itoe doea orang. Sebentar lagi dia dapet liat doea orang laki berdjalan sampe deket padanja ijang satoe berpakean hitem, ija itoelah dia mengenalin toean docter d'Avrigny.
Astaga,, toean docter!" berkatalah toean de Villefort: "Soenggbeh kita poenja roemah ini kena di soempah atawa kena kwalat. Begimanatah sangetnja berdoeka hati dari pada
