— 126 —
menghampirken pembaringannja Moerhaja, dimana Moerhaja dan iboenja sedeng poelas njenjak.
Di atas medja ada ditaro bebrapa mangkok kosong, satoe gendi dan satoe piring obat dadaonan. Marsina kaloearken satoe boengkoesan dari kantong badjoenja, toewang isinja boengkoesan itoe ka dalem itoe mangkok dan ambil itoe obat dadaonan jang laloe diperes aernja ka itoe mangkok. Sasoedanja seleseh, la laloe bangoenin Moerhaja, jang koetika mendoesin telah dapet batoek tida brentinja, hingga itoe obat tida bisa diminoem sabelonnja batoek itoe brenti. Marsina roepanja tida sabar.
„Toenggoe akoe ambil minjak permen,” kata Marsina, dan laloe kaloear dari itoe kamar, aken pergi kamarnja sendiri.
Darmo jang intipken itoe kadjadian, rasaken badannja gemeter. Ampir sadja ia riboet dalem kamarnja Kisem koetika liat Marsina maoe kasi minoem ratjoen itoe di moeloetnja Moerhaja, tapi lekas dikasi inget oleh Sarkisem maka ia tinggal mengintip dengen sabar. Hatinja djadi legah koetika liat Marsina berlaloe dari itoe kamar, maka dengen tjepet Darmo masoek ka kamarnja Moerhaja, ambil laen mangkok dan toewang isinja itoe ratjoen, sedeng di mangkok jang tadi, la laloe isiken peresan dari itoe obat dadaonan toelen. Dengen tjepet la sigra berlaloe lagi dari kamar itoe.
