— 12 —
„Tapi saja sangsi,” kata Ali jang masi tida pertjaja ada orang simpen harta begitoe banjak didalem tanah.
„Kaoe sangsi halnja itoe harta jang terpendem ? Tida saorang Arab jang beribadat, demikian poen tida satoe pendita nanti brani menoelis begini boeat bikin soesa orang. Lagi poen ini roepanja ada testament betoel. Taro kata tida betoel, kaoe toch tida roegi gali itoe lobang jang dioendjoek. Dan kaloe betoel, tidakah itoe barta djadi kapoenjaan kaoe?”
„Di belakang hari kaloe ada achliwarisnja?” tanja Ali.
„Achliwaris itoe tida nanti brani akoe itoe harta kaloe tida ada ini soerat katerangan.”
„Baeklah saja nanti toeroet boenjinja itoe soerat. Saja moesti bilang beriboe-riboe trima kasih sama toean jang soeda kasi katerangan beres.”
„Ja, akoe senang kaoe djadi beroentoeng, Ali,“ kata Joesoef dengen mesem.
Ali laloe permisi poelang.
Joesoef berbangkit dari tempat doedoeknja aken masoek ka dalem. Di samping pintoe, teraling. oleh kaen pedengan pintoe, Joesoef dapetken Marsina mengoempet.
„Kaoe bikin apa disini, Marsina ?” tanja Joesoef dengen heran.
„Saja dengerin toean bitjara sama Ali.“
