— 18 —
di Gang Gardoe dan liwatken roemah-roemahnja toekang grobak.
Limabelas taon jang laloe, mesdjit itoe ada amat dihormatken oleh orang-orang jang berigama Islam; satiap hari Djoemahat ada banjak orang dateng sembajang, tetapi sedari Said: Machmoed bin Alkadar wafat, mesdjit itoe soeda tida ada jang oeroes lagi, hingga lama-lama mendjadi roesak. Sakiternja tempat itoe jang tadinja ada berdiri roemah-roemah goeboek, sekarang soeda djadi koeboeran Islam, sedeng tepi sabela kanan ada melintas djalanan kreta api. Poehoen-poehoen roempoet ada toemboeh dengen lebat. Gentengnja mesdjit itoe soeda rompang, disana-sini, sedeng tembok-temboknja sabagian besar telah goegoer.
Di tempat jang begitoe lebet dengen papoehoenan tentoe ada bersarang banjak boeroeng-boeroeng iblis, teroetama boeroeng serak dan boeroeng kokokbloek jang berboenji saling saoet di sepandjang tempat jang Ali lintasken. Dari roemah, Ali merasa jang hatinja tjoekoep brani aken pergi ka itoe mesdjit, tetapi koetika denger itoe soeara-soeara serem, boeloenja djadi bangoen, hatinja memoekoel keras, sedeng kapalanja ia rasaken djadi gede, ia merasa sangsi apakah baek ia teroesken perdjalanannja atawa balik poelang. Kaloe ia balik, kapankah lagi itoe harta boleh digali. Di waktoe siang tentoe orang bisa liat perboeatannja, sebab satiap
