— 21 —
baroe perna dapet liat oewang jang begitoe banjak. Ia doedoek adepken itoe peti dengen peloek dengkoel sebagi saorang kasimah, bingoeng; tida taoe apa jang ia misti berboeat. Sakoenjoeng-koenjoeng Ali denger soeara prampoean tertawa. Ali tjelingoekan, tapi tida ada apa-apa jang ia dapet liat.
„Astaga,” menjeboet Ali dengen boeloe badan mengkirik. Dalem hatinja berpikir, apakah ada orang intipken padanja? Tida boleh djadi, itoe tempat toch tida ada manoesia. Ach! itoelah soeara setan. Ali tjepet toetoep itoe peti, tatkala mana, dari satoe tempat gelap ia dapet liat bajangan poetih bergerak.
Ali poenja rasa takoet tida bisa tertahan, ia lompat bebrapa tindak dan berloetoet.
„Ampoen Njai Grintil. . . .” meratap Ali dengen soeara gemetar.
Ali poenja sangkahan tida bisa salah lagi bahoea itoe bajangan poetih ada rohnja Njai Grintil, betoel saroepa dengen itoe bajangan jang tadi ia dapet liat di Gang Gardoe.
Njai Grintil ada saorang prampoean jang tatkala idoepnja telah bersoempah aken tida menikah pada bangsa kafir, tetapi lantaran pengaroenja katjintaän, ia soeda ikoet satoe orang Olanda, dari siapa ia hamilken satoe baji, tetapi koetika maoe lahirken baji itoe, ia menoetoep mata sama-sama dengen itoe baji jang masi ada dalem kandoengan. Orang-orang di sakiternja kam-
