— 22 —
poeng Mangga Doea djadi boeat tjeritain, lantaran maitnja ditanem di koeboeran Olanda, itoe Njai jang melanggar soempahnja sendiri, djadi tida mempoenjai tempat di acherat, dan jadi berglandangan sadja saban malem. Kaloe ada orang dapet liat apa-apa di waktoe malem, lantas orang itoe bertjerita bahoea ia dapet liat setannja Niai Grintil. Ali tadinja tida pertjaja, tapi sekarang ia hadepken betoel-betoel itoe setan, maka traoesah heran kaloe ia poenja katakoetan djadi satengah mati. la berloetoet dengen badan goemetar dan awasken apa jang itoe bajangan poetih maoe berboeat padanja. Bajangan‘itoe ada beroepa dengen orang prampoean, ia poenja moeka teroes ka kaki ada dikaroedoengin dengen kaen poetih, tapi boeah dadanja jang montok ada kaliatan njata. Dengen tida berkata-kata bajangan itoe hampirken pada peti oewang dengen pelahan, dan koetika soeda dekat, ia lekas pondong itoe dan bersedia aken bawa pergi. Ali liatken tingkanja itoe setan, tapi koetika dapet liat ia poenja peti oewang maoe dibawa pergi, ia lekas bangoen dan dengen braniken hati, reboet kombali itoe peti. Saling tarik satoe sama laen, achirnja ia berdoea djadi bergoelat. Ali dapet tindi itoe setan, tjekek batang lehernja, tatkala mana sakoenjoeng koenjoeng dari belakang kapalanja ditimpah dengen batoe besar. Ali bertreak satoe kali dan roeboeh tjelentang dengen berkledjetan.
„Lekas lari,... lekas lari... .” kata satoe soeara lelaki.
