— 23 —
III.
KATEMAHA’ANNJA SATOE PRAMPOEAN.
Matahari soeda mentjarken sinarnja jang panas, menemboes pada djendela-djendela roemahnja Moehamad Joesoef. Biasanja waktoe begitoe Ali soeda bikin bersi roempoet-roempoet di kebon belakang dan pelataran depan, sekallan sirem poehoen-poehoen kembang jang toemboe di pot-pot bagoes, atawa kamoedian pikoel aer isiken bak mandi, tapi itoe pagi Ali tida kaliatan. Marsina, begitoe poen Joesoef, tida perdoeliken Ali tida dateng, maskipoen koki Min beroelang-oelang kasi taoe hel itoe pada Marsina.
„Brangkali istrinja sakit keras,” kata Marsina pada koki Min koetika ia ini kasi taoe ka tiga kalinja tentang Ali tida dateng.
Di serambi belakang soeda teratoer satoe medja boender jang ditatakin taplak poetih jang berenda, di atas mana ada satoe nenampan jang berisi tjangkir-tjangkir dan tekoan kopi. Satoe piring dan satoe piso ada ditaro dekat doea potong roti dan satoe boejoeng mentega. Marsina soeda isi tjangkir-tjangkir itoe dengen soesoe dan kopi, silaken toean Joesoef dahar, tapi ia ini jang doedoek di korsi males dengen badan lesoe dan moeka koesoet, gojang kapala beroelang-oelang. Marsina kaliatan girang sadja, lebi girang tingkanja dari hari-hari laen.
