— 29 —
diri, ia merasa kadoea tangannja dipegang oleh Ali dari belakang dan itoe peti direboet oleh Ali. Marsina melawan dengen sakoeat tenaganja, hingga itoe peti djato ka tanab. Ali maoe ambil kombali itoe peti, tapi Marsina djorokin padanja, hingga tergoeling bebrapa depa. Ia angkat kombali itoe peti dan niat maoe melariken diri lekas-lekas sabelonnja Ali kaboéroe bangoen, tapi doegaanja kaliroe, sebab Ali, sebagi singa, dengen lekas bangoen dari tempatnja tergoeling dan toebroek Marsina dengen tenaga keras, hingga ia djato tengoeroep dengen tindihken itoe peti. Marsina tjepet baliken badannja, tetapi ia merasa tenaganja abis aken berontak dari tindihannja Ali, jang salaennja doea dengkoel ada di atas dadahnja Marsina, tetapi djoega kadoea tangannja ada menjekek dengen keras pada lehernja dan ia pikir djiwanja bakal binasa.
Sakoenjoeng-koenjoeng ia liat Ali lepasken padanja dan dengen kaloearken satoe soeara treakan, ia liat Ali djato terdjeroenoek bebrapa depa. Marsina lekas bangoen dan satoe lelaki berdiri di depannja. Marsina terkedjoet, ia liat lelaki itoe masi memegang batoe di tangan, tetapi rasa kwatirnja djadi ilang, malah ja merasa girang, kerna lelaki itoe boekan laen, hanja ada ia poenja soeami, toean Joesoef .. .
Matanja Joesoef awasken Ali jang badannja berkledjetan, sedeng dara ada mengoetjoer deres.
