— 32 —
Ali djato berkledjetan, sebagi binatang ajam jang dipotong. Hatinja jang brani soeda djadi linjap tatkala liat itoe tangan jang diangkat dan mata jang mendelik, hingga ia soeda mendjerit.
Apakah sebabnja Joesoef, dalem itoe podjokan jang gelap, angkat-angkat tangan sebagi orang jang maoe menolak serangannja satoe moesoe dan deliken matanja sebagi orang jang meliat satoe perkara ngeri? Dia ini poen ada dalem katakoetan jang heibat. Ia sampe di roemah dari itoe tempat koeboeran dengen keadaain lemas dan bingoeng. Soeda lama ia rebahken badannja di itoe korsi males dengen karinget mengoetjoer. Hatinja memoekoel keras, pikirannja melajang ka itoe Mesdjit toea, dimana roepanja Ali berbajang lagi di matanja. Ia rasaken boeloe badannja bangoen pada saban kali inget begimana badannja Ali berkledjetan satelah dapet poekoelan batoe dari tangannja. Pikirannja jang roewet melajang semingkin djaoe; ia pikir besok pagi orang nanti dapetken maitnja Ali di itoe tempat, orang katemoeken itoe lobang dan perkakas menggali. Orang aken dateng serepin padanja, sebab Ali bekas ia poenja boedjang. Ali poenja istri jang sakit dan ia poenja mertoea jang soeda kolot, nanti menangis tersedoeh-sedoeh kaloe dapet liat Ali soeda djadi mait. Ali poenja setan tida soeka hati boeat itoe perkara, setan itoe tentoe dateng menggoda, boleh djadi membales sakit
