— 39 —
menangis dengen sedih meliat keadain soeaminja. Ali jang rebah di atas bale tida sekali geraken badannja, maskipoén orang tjoetji kapalanja dengen aer dan boengkoes loeka itoe dengen bebrapa matjem obat dadaonan.
Loeka itoe sabetoelnja tida terlaloe berbahaja, tetapi lantaran itoe batoe jang memoekoel ada di ajoenken dengen keras, maka otaknja Ali ada tergerak keras, hingga itoelah lantarannja jang membikin Ali tida bisa inget orang dengen betoel.
Saneah, begitoe poen iboenja merasa amat heran begimana Ali soeda dapetken itoe loeka di itoe tempat sepi. Lagi poen iaorang inget Ali soeda kaloear di waktoe tengah malem, maka apakah djoega jang Ali bikin di itoe tempat? Begitoelah Saneah berpikir, tetapi tida soeatoe doegain jang membikin tetap pikirannja, melinken ia harep: Ali sendiri nanti bisa tjeritaken boeat oeroesan apa ia soeda pergi ka ifoe tempat sepi di waktoe tengah malem.
Bebrapa djam telah laloe dan achirnja Ali dapet tenaga lagi, hingga ia bisa bangoenken badannja, toeroen dari bale dan doedoek di satoe bangkoe. Matanja jang di boeka besar ada mengawasken istrinja jang djongkok dihadepannja, tetapi itoe mata boekan seperti mata orang biasa, hingga istrinja djadi takoet, pinda doedoek ka atas bale. Kemana djoega istri itoe bertindak, matanja Ali tinggal mengikoeti dengen mendelik.
