— 3 —
pada hari-hari biasa ampir boleh dibilang tentoe satoe auto nanti masoek ka dalem pekarangan itoe roemah, dan satoe anak moeda jang memake pitji stamboel warna mera, atawa kadang-kadang topi helmhoed warna koening, toeroen dari itoe auto jang ia stuur sendiri, disamboet di tangga roema oleh satoe prampoean moeda jang ellok.
Pembatja tentoe lantas bisa doega bahoea doea orang moeda itoe tentoe ada poenja perhoeboengan seperti soeami-istri, tetapi apakah sebabnja anak moeda itoe maoe ambil tempat jang begitoe soenji?
Sebagi anaknja saorang Arab jang anoet igama dengen betoel dan hargaken ia poenja toeroepan Said dari bebrapa laloehoer, maka maskipoen Moehamad Joesoef bin Alsagaf soeda djadi begitoe tergila-gila sama itoe prampoean Preanger, toch ia tida maoe bangsanja dapet taoe kaloe ia ada piara itoe prampoean dengen loepaken istri kawin dan anak-anaknja.
Joesoef ada anak satoe-satoenja dari almarhoem Said Moehamad Ibrahim bin Alsagaf, toean tanah jang paling hartawan di Tjimanggis.
Sedari wafatnja itoe ajah, Joesoet dapet kamerdikaan loeas. Kaloe doeloe, waktoe ajahnja masi idoep, Joesoef melinken mampoe pake satoe sado preman jang ampir bokbrok, sekarang ia bisa pake satoe auto model landaulet jang bagoes.
