— 4 —
Ia poenja kalojaran dalem hal memake oewang, soeda bikin ia dapet banjak sobat disana-sini. Begitoelah dengen perantaraannja ia poenja sala satoe sobat di Bandoeng, Joesoef telah berkenalan sama satoe prampoean latjoer bekas anak komedie bangsawan.
Marsina moesti dipoedji ada satoe prampoean tjantik. Warna koelitnia, sebagimana kabanjakan ada pada prampoean-prampoean Preanger, ada poetih djerni. Marsina baroe beroemoer kira-kira 22 taon, badannja montok, pinggangnja langsing, ramboetnja gemoek, ditambahken dengen sedikit poni jang membikin tampang moekanja djadi lebih ellok. Sapasang alisnja ada item, sedeng jang tida terlaloe besar, tetapi tadjem, adan mempoenjai sorot jang menarik hati. Moeloetnja ada sedikit djeding, satoe pengasih natuur jang bawa peroentoengan bagoes pada ini prampoean, tetapi djoega membawa sifat djahat dalem hatinja. Sasoeatoe lelaki nanti merasa terhiboer bila dapet liat mesem atawa tertawanja ini prampoean, apa poela denger ia poenja soeara tertawa jang lemah lemboet.
Marsina tida tampik lagi aken dipiara oleh Joesoef, sebab salaennja Joesoef sendiri ada satoe anak moeda jang tjakep, koelitnja poetih, tida seperti ajahnja jang item, dandanannja perlente, djoega tangannja Joesoef ada terlepas, sebab ia
