— 62 —
itoe peti, akoe lantas serang setan itoe, sebab akoe lebih hargaken harta itoe dari pada kamatian. Akoe djadi bergoelet, tapi dengen tida kataoean siapa jang poekoel, besokannja akoe dapetken dirikoe menggletak di tengah-tengah mesdjit itoe dengen loeka di kapala. Akoe laloe merajap sampe di pinggir gili-gili djalanan kreta api aken berangkat poelang, tapi tenagakoe abis dan akoe djato dengen tida inget orang. Sekarang, Saneah, kaoe tebak siapa adanja itoe orang jang poekoel akoe dengen batoe? Siapa adanja itoe prampoean jang menjaroe djadi setan?”
Saneah gojang kapalanja.
„Apa kaoe tida kliroe kaloe doega Nji Marsina dan Joesoef soeda berboeat begitoe?” tana Saneah, sebab sangsi kaloe Ali nanti djatoken doegaan ka sitoe.
„Tida bisa kliroe. Joesoef ada satoe bangsat jang paling pande berpoera-poera. Ia bikin dirinja terpandang moelia, sebab tida soeka serakahken itoe harta dan kasi katerangan tjoekoep hal adanja harta itoe, tapi malem-malem ia soeda adjak Nji Marsina ka itoe mesdjit, roepanja maoe doeloein ambil itoe harta, tapi koetika liat akoe ada di sitoe ia lantas soeroe Marsina menjaroe djadi setan. Koetika liat akoe maoe matiken Marsina, Joesoef lantas serang dengen batoe. Besokannja tentoe ia soeroe Min tjari taoe dan dapet katerangan akoe tida mati, hingga ia jadi kwatir sekali dapet
