— 63 —
pembalesan, maka ia lantas pinda ka Tjiwaringin, dengen harepan soepaja kita tida bisa katemoeken lagi padanja. Tetapi Allah-ta-allah soeda bawa kita kamari boeat bikin peritoengan padanja. Begitoelah dengen koedrad Allah akoe soeda dateng di roemahnja bocat betoelken bilik, di tempat mana djoestroe ada itoe lemari jang moesti dikiserken. Dalem itoe lemari akoe dapet liat itoe peti oewang, jang lantas djoega akoe kenalken ada itoe peti jang akoe gali di mesdjit roesak dan berisi itoe oewang f 50,000. Pikirankoe jang gelap, itoe waktoe djadi terang sebagi matahari, hingga lantaran sengit akoe soeda serang pada Njai Marsina dan toean Joesoef, akoe kapingin sekali ambil djiwanja dengen akoe poenja djeridji. Nah, sekarang kaoe taoe doedoeknja perkara, Saneah. Kaoe! pikir pembalesan kita moesti bikin pada itoe doea bangsat.”
„Ach, Ali, boeat apa kita bikin pembalesan. Dia ada orang hartawan, kita orang miskin. Biarlah Allah sendiri nanti bales itoe kadjahatan,” kata Saneah.
„Kaoe kliroe Saneah,” kata Ali dengen mata menjala. „Allah tida bisa toeroenken tangan, ia melinken lindoengi orang jang hendak membales pada manoesia jang berboeat kadjahatan.”
Saneah mengelah napas. Ia taoe Ali ada poenja napsoe jang keras dalem segala perkara jang tida pantes.
