— 5 —
poen, dengen harta peninggalan ajahnja, ada tjoekoep hartawan.
Joesoef merasa senang hati dapet ini prampoean, tetapi ia bingoeng djoega waktoe ia maoe pindahken prampoean ini ka Betawi. Ia ada poenja bebrapa roemah sewaan di kampoeng Kodja dan Kampoeng Kroekoet, tetapi disitoe ada terkenal sebagi kampoengnia orang-orang Arab. Orang-orang Arab tentoe merasa tida senang hati bila dapet taoe Joesoef ada piara satoe prampoean Melajoe dan bekas djalang di Bandoeng. Salaennja begitoe, orang taoe djoega Joesoef ada poenja istri kawin dari toeroenan jang terhormat, dari istri mana Joesoef soeda dapet doea anak. Joesoef ada terantjem aken bisa dipisaken dari pergaoelan orang-orang Arab jang terhormat. Ia poenja nama jang terindah sebagi toeroenan Said sedjati aken tida di-indahken lagi. Dari sebab begitoe, Joesoef maoe perhoeboengannja sama Marsina tinggal resia. Beroentoeng ia dapetken itoe roemah di Mangga Doea, satoe tempat sepi. Joesoef poenja pergi dan dateng di itoe roemah djarang sekali dapet diliat orang, sebab ia belon perna brentiken autonja di depan pekarangan, selamanja dimasoeken ka dalem dan pintoe pekarangan laloe di toetoep lagi.
Pada soeatoe hari Minggoe, tatkala matahari ampir silam di Koelon, Joesoef ada dateng dengen
