— 69 —
Joesoef menengok dan lantas djoega kenalken bahoea orang jang menegor, ada ia poenja sobat kekal dari waktoe masi anak-anak, jaitoe Raden Aria Soedarmo.
„Eh! kaoe ada disini, Darmo,” kata Joesoef dengen panggil sobat itoe poenja nama ringkes, „Apa kaoe tida djadi berangkat ka Djambi? Apa kaoe bikin disini dengen pakean begini kotor?”
„Ah! kerdjaan tjape,” sahoet Darmo dengen keboet-keboet ia poenja topi Helmhoed jang djoega soeda mesoem. „Kaoe tentoe taoe, sasoedanja tida beroentoeng djadi architect, akoe laloe masoek djadi opzichter, jang akoe lakoeken sampe sekarang. Baroe bebrapa hari akoe dikirim kasini, boeat oekoer tanah-tanah sakiternja kota Bogor, sebab Gemeenteraad ada niatan aken loeasken kota ini. Hawa matahari jang bakar kapalakoe dari pagi, soeda bikin akoe aoes dan mampir disini boeat minoem sedikit aer blanda. Marilah kitaorang doedoek. . Akoe nanti tjeritaken perdjalanankoe ka Djambi.”
„Tapi sekarang akoe maoe berangkat poelang,” sahoet Joesoef jang merasa maloe aken banggaken ia poenja piaraan di depan orang banjak, „akoe ada niatan aken oendang kaoe bersantap sabentar sore di roemahkoe di kampoeng Tjiwaringin no. 14. Apakah kaoe tida tampik? Di sana kita bisa beromong -omong lebih banjak.”
„Baek sekali. Kenapakah djoega akoe tampik ?
