— 70 —
Malah kaloe kaoe ada sedia kamar, akoe maoe minta djoega menginep di roemahmoe itoe. Tetapi aneh betoel kaoe soeda pinda di Tjiwaringin. Soeda brapa lama kaoe pinda di kampoeng itoe ?”
„Baroe satengah boelan,” sahoet Joesoef.
„Bersama kaoe poenja istri dan anak-anak ?” tanja lagi Darmo jang tida taoe kaloe Joesoef ada poenja piaraän.
„Boekan, hanja berdoea sadja dengen akoe poenja penghiboer, satoe prampoean tjantik jang kaoe bisa liat dari sini." Sambil berkata begitoe, Joesoef menoendjoek ka autonja, dimana Marsina doedoek menoenggoe.
Darmo tertawa, tetapi la tida membanjol.
„Akoe harep bisa adjar kenal pada kaoe poenja Njai sabentar sore,” kata Darmo, dan Joesoef laloe angsoerken tangannja, teroes berpamitan.
„Akoe girang bisa katemoe lagi pada sobatkoe itoe,” kata Joesoef pada Marsina tatkala la doedoek dalem autonja dan djalanken menoedjoe ka roemahnja.
„Siapa itoe,” tanja Marsina, „kenapa toean tida adjak ia ka roemah?”
„Dia itoe ada akoe poenja sobat dari masi ketjil. la soeda trima akoe poenja oendangan aken bersantap sabentar sore di roemah kita malah akoe oendang djoega aken la menginep. Apa kaoe soeka bikin makanan jang enak, Marsina ?”
