— 79 —
saoemoer idoep. Tetapi Darmo tida boleh dibilang miskin, ia ada toeroesan Raden, ajahnja ada poenja banjak harta, dan Darmo sendiri ada dapet gadji besar.
Soeda lama memang Marsina ingin poelang ka roemah orang toewanja, tetapi Joesoef senantiasa menghalangken kainginannja, maka sahandenja Darmo bisa toeroetin kahendakan hatinja, Marsina soeda berniat aken adjak djedjaka ini pinda ka Bandoeng, di kota mana Marsina nanti beli roemah dan sawah-sawah, soepaja bisa idoep dengen/santausa.
Marsina oeroek pik'iannja dengen itoe hal-hal jang enak dan sirem rasa-rasa hatinja dengen itoe pertjintaän-pertjintaän jang ia aken trima dari Darmo jang tjakep.
Sedeng Marsina melajangken pikirannja ka itoe djoeroesan, Darmo sedeng beromong-omong dengen Joesoef di pertengahan depan, tetapi lagoenja ia poenja soeara ada menjataken seperti la ada amat ngantoek. Joesoef dapet liat itoe hal dan laloe menanja kaloe-kaloe Darmo soeda merasa kapingin aken rebahken diri, hal mana lantas didjawab oleh Darmo bahoea sasoenggoenja djoega ia merasa amat ngantoek lantaran siangnja soeda kerdja banjak.
Lotjeng baroe mengoetaraken djam sapoeloe saperampat dan Darmo laloe permisi masoek ka kamarnja. {{nop}|
