— 91 —
Joesoef jang sedari tadi tida tjampoer omong, hanja doedoek diam membatja soerat-kabar, sekarang baliken moekanja dan berkata pada Marsina: „Biarlah kasi la menoempang disini. Kita masi ada poenja satoe kamar boedjang, djoega memang kita ada niat plara banjak boeroeng-boeroeng dan ajam jang bagoes-bagoes, kaloe dia ada disini nanti bergoena boeat rawatken itoe binatang.”
„Baeklah kaloe toean maoe begitoe,” kata Marsina achir-achir dan adjak itoe prampoean masoek ka dalem.
Marsina ambil bebrapa kaen toewa dari lemari, briken itoe pada prampoean tadi. Ia ini merasa girang dan oetjapken banjak-banjak trima kasi.
Koetika masoek di pertengahan, Marsina dapet liat Darmo baroe kaloear dari kamar mandi. Parasnja ini djedjaka ada seger dan kallatan girang, laen sekali dari parasnja jang kamaren.
Joesoef djoega laloe masoek dan masing-masing doedoek di media makan boeat dahar.
Sahabisnja itoe, Darmo laloe berdandan. Ia poenia orang-orang soeda menoenggoe di depan gedong. Itoe hari Darmo berangkat ka tempat kerdjaäanja sedikit siang, tapi hatinja senantiasa merasa senang, hingga dengen tida terasa di sepandjang djalanan moeloetnja bersoeit-soeit, sedeng di moeloet itoe ada teroekir satoe senjoeman, seperti djoega itoe pepoehoenan di sepandjang djalanan jang kallatan seger, dan itoe goenoeng-goenoeng jang tinggi, adjak mesem padanja.
