184
soeda trima seperti pembrian, samoea misti di simpan sadja.
Maka barang pakean jang bermoela itoe di tjoetji bersi dan di djoeal, karna satoe oendang-oendang dari itoe perkoempoelan ada bilang jang samoea orang misti berpake pakean jang toea-toea dan djelek-djelek, dan itoe bras di simpan baik-baik boeat bernanti soeatoe waktoe jang tiada dapat bagitoe banjak adanja.
Orang boleh liat jang radja orang-orang toekang minta-minta ada satoe radja jang djaga baik barang apa jang bergoena boeat hamba-hambanja, dan jang itoe perkoempoelan di parenta oleh oendang-oendang jang amat bagoes adanja.
Barangkali Ming, tatkala Fo-Hop tegor padanja dari dia poenja kaheiranan jang salamanja bertamba-tamba, soeda bikin ini peringatan salagi meliat kapada itoe toekang minta-minta, jang berdjalan liwat di hadapannja, ambil dia-orang poenja bagian dan jang sekarang samoeanja tiada bongkok, pintjang dan ikat loeka-loeka.
Komedian itoe Sang meninggalkan dia poenja bangkoe kaijoe jang dia soeda pake boeat dia poenja tachta keradjaän dan bitjara kapada kapala policie itoe.
— Toean, sekarang saija ada sempat.
— Saija ingin bitjara padamoe sendiri sadja, — menjaoet Fo Hop.
Itoe radja orang-orang toekang minta-minta kasi satoe parenta dengan soeara njaring dan dalam sabantaran sadja semoea orang laloe dari sitoe.
Dia poenja hamba-hamba soeda laloe seperti kilap.
