18
Kapala policie itoe mengenal padanja serta seboetkan namanja. Bapa itoe jang amat tjilaka mengangkat kapalanja. Maka bertjoetjoer aer dari kadoea mata-matanja.
Dia taoe jang pada sabantaran haroes dia misti meloepakan hatinja jang sedi, maka bagoenlah orang toea itoe jang ramboetnja soeda poeti dan kasi satoe tanda kapala Fo-Hop jang dia hendak toeroet sama-sama.
Bapa Lin dan Fo-Hop tiada bitjara satoe perkataän dan tiada lama dia-orang sampe dimana itoe tampat jang amat samar.
Prampoean moeda itoe jang ada seperti kembang soeda pata tangkenja adalah doedoek disitoe, tetapi tiada brani angkat moekanja, dan melainkan dadanja jang bergontjang kras oleh sebab tangisannja, jang mana boleh kalihatan jang dia masi hidoep adanja.
Maid itoe orang soeda toetoep dengan satoe kain panas dari soetra, doea hamba-hamba ada djoega disitoe dan itoe maid masi ada tinggal begitoe djoega seperti waktoe baroe orang mendapat padanja.
Maka adat di negri Tjina ada larangan kras sekali jang tiada boli sa-orang dateng raba menoesia jang soeda ti boenoe seblonnja policie dateng; dari itoe larangan adalah doea sebabnja: pertama pamarenta kaädilan boleh mendapat sampat berboeat kapreksän dengan gampang oleh doedoeknja itoe maid begimana kadjahatan itoe soeda di boeat, dan kadoea orang jang poenja kebon, dimana itoe jang di boenoe ada kadapatan, boleh di dakwa di hadepan hakim oleh sanak-
