– 100 –
soeka mengirim kaoe poenja bebrapa orang boewat membantoe sebagi kita poenja spion.“
„Baeklah; akoe atoer itoe semoea dengen beres. Tapi toako menginep di mana, apa di hotel Ko-seng-tjan djoega sebagimana biasa?“
„Ja, betoel.“
„Kaloe begitoe sabentar akoe dateng ka sana bersama akoe poenja bebrapa orang,“ kata Lauw Soe Sam.
⁂
Lauw Soe Sam pegang betoel iapoenja djandji, kira djam ampat sore, bersama ampat kawannja ia dateng mengoendjoengin hotel Ko-seng-tjan, Sesoedanja diadjar berkenalan sama Lee Siang Hiap, Thio Po Hoei dan laen laennja, iaorang lantas berdamiken lagi apa jang moesti dilakoeken, kamoedian Lauw Soe Sam lantas prentahken iapoenja ampat saderek pergi lakoeken penjelidikan ka dekatnja Hong-sek-kang di sabelah loearnja pintoe kota selatan. Kira satoe djam kamoedian dengen berpisahan Tio Beng, Lauw Soe Sam, Lee Siang Hiap, Thio Po Hoei dan laen-laennja menoedjoe ka pintoe kota selatan.
Oleh kerna itoe waktoe ada terdjadi itoe perampokan-perampokan dan pemboenoehan jang dilakoeken oleh It Kie Tho, maka di sesoeatoe pintoe kota ada dibikin pendjagahan keras dan tilik dengen terliti sesoeatoe orang jang mave masoek atawa poen kaloear. Kira-kira ampir djam anam, soeda dekei waktoenja pintoe kota bakal ditoetoep, dari loear kota ada mendatengin tiga orang jang dandanannja seperti kaoem pakerdjahan. Roepanja itoe tiga orang ada kenal baek sama pendjaga pintoe kota, sebab iaorang tjoema ditegor sadja, kamoedian lantas dikasi masoek.
