— 7 —
sebab biar poen ia ada mempoenjai ilmoe silat tinggi, di‘indahken dan ditakoetin oleh orang-orang di kalangan lioklim, tapi djika ia meloeloe oendjoek kabranian dan kagagahannja dengen setiara sombong, sedikit poen tida maoe mengopenin pada orang-orang dari. kalangan lioklim, nistjaja lebih siang ia soeda kadjoengkel lantaran dimoesihin oleh semoea rampok dan begali
Bermoela memang dengen sasoenggoenja Tio Beng bikin nama dengen iapoenja kapandean ilmoe silat dan kakoewatan sendjata, perloenja soepaja iapoenja nama djadi terkenal dan ditakoetin. Sapandjang ia moelai bikin nama memang djoega ia teroes goenaken kakerasan terhadep sasoeatoe kawanan begal jang maoe mengganggoe iapoenja barang-barang tanggoengan, hingga boekan sedikit kawanan begal jang moesti toendoek di bawah iapoenja ilmoe kepandean silat dan kakoeatan sendjata ; tapi pada sasoedanja iapoenja nama djedi besar dan terindah, ia moelai pake taktiek lemboet dan lebih manis, kaloe dengen itoe tjara tida berhasil, baroelah ia goenaken lagi kakerasan. Malah di antara kawanan perampok jang kakoerangan ongkos, djika dengen teroes terang minta bantoean padanja, sedikit banjak tentoe Tio Beng soeka membantoe. Tegasnja Tio Beng perlakoeken itoe kawanan penjamoen dengen kakerasan dan djoega malepas boedi.
Oleh kerna itoe djoega, biar poen di antara orang-orang dalem kalangan lioklim banjak jang merasa bentji padanja, toeh banjak djoega jang merasa soeka dan indahken padanja dengen satoeloesnja hati, boekan meloeloe lantaran merasa takoet. Biar poen jang merasa bentji saban-saban maoe obor kawan-kawanja boewat memoesoehin pada Tio Beng, tapi lantaran ada laen golongan jang merasa soeka padanja, fihak jang maoe memoesoehin tida bisa terlaloe besar djoemblahnja,
