-8-
maka Tio Beng bisa pegang tegoe iapoenja kadoedoekan dan kaangkeran, kerna biar poen soeda perna ditjoba boewat mengroeboetin, tapi achirnja marika itoe kena dilabrak sampe koetjar-katjir oleh Tio Beng.
Tida bisa disangkal bahoewa Tio Beng telah berboewat pinter sekali dengen satjara begitoe, dan inilah djoega sebabnja iapoenja nama tinggal gilang goembilang sampe tigapoeloeh taon lamanja. Tapi moesti diakoeh djoega bahoewa Tio Beng poenja ilmoe kapandean silat samingkin lama poen djadi samingkin bertamba tinggi, sebab ia ada saorang jang soeka beladjar dan tida bertabeat sombong, pada sasoeatoe orang jang ada mempoenjai ilmoe kapandean, selamanja ia soeka minta pengadjaran dengen tida maloe-maloe, hingga iapoenja ilmoe kapandean djadi samingkin bertamba tinggi sadja.
Ong Ban Kim koetika mendenger omongannja Tio Beng begitoe roepa, tida mengotje lebih djaoe, hanja lantas mengangkat iapoenja iapoenja tjangkir arak persilahken semoewa orang minoem. Salaenja Tio Beng sendiri, semoewa orang bikin kering marika poenja tjawan, kamoedian lantas makan dengen bernapsoe dan goembirah. Dengen tida merasa itoe tjangkir-tjangkir soeda diisi sampe tiga kali dan pada waktoe maoe diisi boewat ka ampat kalinja, ternjata itoe tempat arak poen soeda kering, hingga Tio Beng tida perloe menjega.
Tapi Ong Ban Kim jang memang dojan soesoe matjan, lantas prentahken djongos ambil lagi satoe tempat arak jang terisi penoeh. Tio Beng melarang penggawe-pengawenja minoem lagi, tjoema sadja Ong Ban Kim jang sangat dojan minoem, beroelang-oelang mintaken soepaja itoe penggawe-penggawe boleh minoem lagi saorang satjangkir. Oleh kerna ia me-
