— 12 —
„Wah ! tjilaka besar ! kita kena terdjebak,“ berseroeh ia; tapi ternjata soeda kasep, sebab itoe waktoe dengen tida berdaja lagi ia djato doedoek di satoe korsi dan dengen senderken kapalanja ka blakang korsi dan dinding tembok ia djadi poeles dan tida inget satoe apa lagi.
II.
IT KIE THO MOELAI BEKERDJA.
—o—
Itoe roemah makan di mana Tio Beng dan laen-laennja menginep bersama marika poenja barang-barang bawa'an diboeka oleh satoe pendjahat jang soeda lama tjoetji tangan. Ia itoe bernama Goci Soei-Hong jang doeloenja soeka melakoeken perampasan dalem iapoenja roemah makan jang ia oesahaken dengen pengaroehnja sematjem obat poeles bikinannja sendiri jang dinamaken tjoei ma yo. Ini obat poeles, boekan sadja ampir tida ada rasanja, malah kaloe ditjampoer sama laen-laen barang tjaer, biar poen jang bening, sama sekali tida mengoendjoek warna apa-apa. Malah bisa ditjampoerin djoega dalem makanan atawa poen aer thee, tapi ampir tida mengasi rasa apa-apa, teroetama djika dalem aer thee jang medok.
Goei Soei Hong soeda beroemoer limapoeloeh lima taon, dan doeloenja ia melakoeken iapoenja pakerdjahan di bilangan Ouwlam, Ouwpak, Holam, Anhoei, dan Shoatang, selamanja dilakoeken dengen tertip dan pande, hingga belon satoe kali ia kena beroeroesan sama politie dan pembesar. Bila di satoe tempat ia moelai ditjoerigaken, lantas ia brentiken pakerdjahan djahatnja sembari mengilangken segala
