— 20 —
Goei Soei Hong dan It Kie Tho bekerdja dengen tjepet sekali, hingga achirnja tjoema tinggal satoe goeloengan lagi jang belon ditjemploengken, dan itoelah dengen setjara kahetoelan ada Ong Ban Kim bersama iapoenja doea penggawe. Mendadak kadengeran dari sabelah ilir ada soewaranja penggajoe-penggajoe jang memoekoel aer, berbareng dengen itoe kadengeran djoega soewaranja kamoedi jang bergeot-geotan.
„Lekas! tjemploengin sadja tiga-tiganja dengen satoe kali lempar,“ kata Goei Soei Hong.
It Kie Tho lantas toempoek itoe tiga orang jang berada dalem kaadahan seperti mati, kamoedian bersama Goei Soei Hong iang memegangin bagian kaki-kakinja, dan ia memegangin bagian poendaknja, lemparken itoe tiga orang ka dalem soengei. Satoe kali ini lantaran satoe kali lempar tiga orang, soeara aer jang bergedjeboeran ada lebih keras dari semoea jang terdjadi doeloean.
„Hajo, lekas poeterken ini praoe!“ mamerentah Goei Soei Hong, jang ambil djoega satoe penggajoe boeat membantoein pada orang-orangnja, dan ditoeroet oleh It Kie Tho.
Dalem sedikit sa'at sadja itoe praoe soeda dipoeterin kapalanja mengoedjoer balik ka djoeroesan district Tjimgoan, kamoedian dengen berbareng iaorang kasi kerdja marika poenja penggajoe. Sasoeatoe gajoehan ada begitoe tetap dan antap, maka dalem sedikit sa'at sedja itoe praoe soeda terpisa djaoe dari bilangan Tjip-lioe-tan. Blakangan dengen terbantoe oleh lajar jang marika pasangken, kira-kira djam ampat pagi itoe kawanan pendjahat soeda bisa balik poelang ka pelaboean di dekat district Tjimgoan. Goei Soei Hong dan It Kie Tho dengen tersipoe-sipoe mendarat dan
