-22-
semoeanja djadi begitoe lesoe dan djato poeles dengen tjepat, begitoe poen ia sendiri jang sama sekali tida minoem arak. Tida bisa salah lagi tentoe itoe hotel ada satoe hotel item - hotel jang diboeka oleh pendjahat, jang soeka menjilakaken tetamoe-tetamoenja boeat dirampas barang miliknja.
Berpikir sampe di sini, lantas sadja Tio Beng djadi sengit sekali, berdaja balikin badannja boeat bernang ka pinggir; tapi apa maoe djoestroe pada itoe waktoe ia tersedot oleh aliran aer jang sanget deres, pada sabelonnja ia bisa berboeat satoe apa, iapoenja badan lebih siang soeda terbawa anjoet oleh itoe aer deres, sekali poen ia bernang sakoewat-koewatnja, toch ia tida bisa lawan alirannja itoe aer jang sanget deres. Apapoela itoe waktoe ia rasaken badannja masi lelah disebabken oleh pengaroehnja ma-tjoei-yo, jang sekali poen soeda tersedar dari maboknja, toch tida oeroeng membikin saкoedjoer badan djadi lemas kaloe ia teroes berdegingan boeat bernang lagi ka atas, achirnja ia bisa kalelap lantaran ka'abisan tenaga. Maka ia biarken badannja terbawa oleh alirannja aer deres, kamoedian ia maoe mentjari koetika boeat minggir kabagian aernja itoe soengei jang tida terlaloe deres, dan achirnja mendarat.
Lama djoega ia terbawa oleh alirannja itoe aer deres, dan koetika rasaken djalannja aer tida begitoe deres lagi, lantas sadja ia moelai bernang ka pinggir, ternjata di itoe pinggiran ada satoe teloek, di mana ada satoe praoe besar jang lagi berlaboe. Meliat itoe praoe mendadakan Tio Beng djadi seger dar: bersoemangat, dengen bebrapa gerakan kaki tangan jang keras ia soeda bisa masoek ka itoe teloek, dan bebrapa kali lagi ia soeda berada di pinggirnja itoe praoe besar.
,,Toeloeng! toeloeng!" berseroeh ia.
