― 53 ―
ia sembajang di hadepan djinazatnja iapoenja istri, bersoempa boeat bikin pembalesan pada It Kie Tho, dan kaloe sedja itoe maksoed belon kasampean, ia tida nanti brenti berdaja.
Sasampenja di iboe kota provincie, ternjata itoe iboe kota telah diadoek oleh It Kie Tho, hingga ka‘amanannja djadi begitoe roesak. Bebrapa banjak hartawan roemahnja telah disatronin dan dirampas oewang atawa barang berharganja. Sala satoe di antaranja itoe orang-orang jang kerampoken, teritoeng djoega Ong giesoe, jang mendjabat pangkat giesoe di kota redja. Sedeng dalem iapoenja roemah di Boetjiang, tjoema tinggal sadja iapoenja anak prampoewan jang baroe menikah bebrapa boelan lamanja, pada poetranja tjongtok dari Shoatang Han Koei Sioe. jang bernama Han Yoe Tjay Koetika terdjadi perampokan dalem roemahnja Lie Giesoe, itoe sapasang kamanten baroe djoestroe bereda dalem itoe roemah, roepanja lantaran bikin perlawanan iaorang soeda diboenoeh mati oleh It Kie Tho.
It Kie Tho saban saban melakoeken perampokan dan pemboenoehan, senantiasa tinggalken itoe tanda loekisan satangke boengah tho dengen samatjem tjap poepoer poetih.
Samentara itoe pemboenoehan pada anaknja satoe tjongtok dan poetrinja satoe giesoe, soeda tentoe sadja membikin gemper kalangan orang berpangkat di kota Boetjiang, teroetama Boetjiang tihoe jang djadi sanget repot dan iboek, kerna ia mendapet tegoran keras dari tjongtok, jang merasa moerka lantaran itoe perampok jang menggangoe ka‘amanan tida djoega bisa dapet ditangkap, Tihoe oleh kerna digentjet oleh chefnja, ia poen gentjet lagi pada iapoenja kapala-
