94
Hongtouw Ong, Wakong lantas poelang, tjarita sama binienja, Wakong kata lagie: en sekarang goewa „phie” lagie djadie Kioe-Kou-Tian-Tjoen poenja roepa, en binienja kata: kaloe begitoe sekarang lekas „phie” Kioe-Kou-Tian-Tjoen pegie die Hongtouw.
Tjarita Hongtouw Ong lagie doedoek, orangnja bilang kata : ada Taij-It-Kioe-Kouw-Tian-Tjoen dateng, en Hongtouw Ong dengar lantas kloewar samboet adjak masoek doedoek die kroesie membrie hormat dengan kasie makan the, Hongtouw Ong berkata: Tian-Tjoen dateng kemarie apa kabar? Tian-Tjoen palsoe kata: maoe ambil aloes-aloes orang matie bawa die langit, en lantas Goanswe kata: saija mistie katja'in doeloe, sebab doeloe'an Wakong soeda „phie” djadie soeroe'an Tochan maoe ambil itoe aloes, djadie sekarang saija atie-atie, en Tian-Tjoen palsoe kata: apa loe tiada kenallin sama pintjeng en maoe katja'in? Goanswe kata: Tian-Tjoen djangan mara, tetapie saija mistie katja'in doeloe, lantas ambil katja maoe katja'in, en Wakong soeda larie die atas awan, maoe dengar Goanswe bitjara apa sama Hongtouw Ong, betoel Goanswe bitjara sama Hongtouw Ong kata: ampir kena die akallin, Hongtouw Ong kata: pegimana loe bole taoe, Goanswe kata: kaloe betoel Taij-It-Kioe-Kouw-Tian-Tjoen dateng diesini, dia ada poenja 9 kepala (Saij Singa) seret kretanja dengan ada moeritnja ikoet die pingir krete, en Tian Tjoen pake selendang taboer mas, ada 2 anak Kimtong gioklie iringin, en ada toengketnja sama bokor mas terisie aer emboen boeat kasi itoe aloes minoem, ada poenja kipas nama Ngobeng Shi, en sampe die pintoe Hongtouw akerat ada setan matanja 1 nama Kimtjeng Tokgan Kwie njang boeka itoe akerat djadie terang,
