XX.
KATJINTA'AN ADA LEBI MENANG
DARI PAKSA'AN.
Di oedjoeng tamannji Mohamed Ali pacha,
tiada djaoe dari tepi soengi, ada satoe roema
kebon dari bamboe di bawa poehoen-poehoen
besar ; di sapoeternja, di atas dan di pinggirnja
ada di tanem roepa-roepa poehoen kembang jang
baoenja amat sedep.
Dalem roema kebon ini ada satoe bangkoe rotan, satoe medja dan bebrapa bangkoe kaki, disedia boeat Mohamed Ali pacha dan sobat-sobatnja atawa tetamoe-tetamoe prempoean jang soeka me mandang segala kainda'an di soengi Bosporus.
Sekarang, di waktoe tenga malem, ini roema kebon ada djadi tempat semboeni dari Mrika, anaknja Mohamed Ali, jang diam-diam kaloear dari kamarnja dan dateng di ini roema kebon aken menoenggoe datengnja Chefket effendi, pada siapa dengen semboeni ia ada tare tjinta.
Pengawakannja nona Mrika ada ketjil dan tinggi, seperti almarhoem iboenja, matanja biroe sebagi ajahnja, ramboetnja item, aer moekanja lemas serta boto, swaranja lema lemboet. Merdoe sekali swaranja ini hanoem, djika ia menjanji menoeroet lagoé Arab atawa kaloe ia menjanji lagoe Europa sambil doedoek maen piano jang dibli dari Weenen. Sebagi anak satoe-satoenja dari Moha-
