192
Tiada dapet bantoean.
„Tetapi boeat menjampeken itoe maksoed besar, balatentara jang ada di sini terlaloe sedikit djoemblanja dan lagi blon tjoekoep pladjarannja dalem
ilmoe prang,” menjaoet Mohamed Ali pacha sambil tarik napas dan gojang kapala. „Poen saja memang ada ingetan geraken balatentara aken oesir pasoekan prang moesoe dari tepi soengi Donau, tetapi saja moesti menoenggoe doeloe datengnja soldadoe bantoean dari Stamboel. Sekarang djoemblanja laskar di sini tjoema ada kira-kira 35.000 orang, antara mana ada banjak tentara dari barisan tiada tetep dan satoe barisan dari Egypte, tapi ini barisan Egypte tiada bisa dimadjoeken dan digoenaken
boeat di medan prang, sebagimana jang kita orang ingin berboeat, sebab iaorang sakedar toeroet sadja prentanja prins Hasan.[1] Ingetlah, toean-toean, itoe
barisan Egypte ada barisan pembantoe jang Khedive kirim, menoeroet kewadjibannja sebagi satoe hamba dari Baginda Sultan, aken membri bantoean, apabila karadja‘an Toerki ada dalem prang. Tapi Khedive lebi soeka balatentaranja tiada dimadjoeken di tempat oedjan pelor, hingga barisan Egypte jang sekarang ada pada pasoekan prang kita orang
sakedar ada sebagi perhiasan sadja.”
„Toch laskar prang kita orang ada tjoekoep kekoeatan aken oesir balatentara Rus jang ada
- ↑ Prins Hasan ada poetranja Khedive (Radja moeda) dari Egypte (Mitsir) Ismael pacha. Ini prins ada kapalaken satoe barisan dari Egypte, jang Khedive, seperti Radja moeda jang taloek pada Sultan Toerki, wajib kirim aken bantoe pada Toerki dalem prang.
