Moefaketan di Stamboel 211
dipoedji ketjakepan serta kakosenannja, sebab katanja ini doea generaal soeda sring kalaken pada moesoe. Seantero tempat dari di itoe iboe kola karadja'an Toerki orang rame bitjaraken perkara prang satjaranja sendiri. Orang bilang, tiada lama lagi tentoe pasoekan prang Rus bisa dibinasaken sama sekali dan Sultan nanti dapet poelang seantero negrinja jang didoedoeken oleh moesoe-moesoenja.
Di waktoe malem semoea pacha soeda bikin pesta di astananja di Stamboel dengen senang hati serta minoem champagne.
Rahajat Toerki pertjaja betoel, angkatan prang Rus tiada lama poela nanti dibinasaken semoea dan panglima dengen pasoekan prang Toerki jang gaga perkasa nanti masoek di Rusland dari bebrapa tempat, aken bales sakit hati pada ini moesoe besar.
Di kantoor mantri prang soeda ditrima kabar jang lebi betoel, tapi masi banjak djoega kabar jang dipoeter doedoeknja. Saben-saben di sana dibikin perhimpoenan besar, di mana dibitjaraken banjak hal, tapi perkara jang sanget penting aken menoeloeng negri Toerki jang teramtjem bahaja, inilah sama sekali tiada dioesik. Dalem ini perhimpoenan-perhimpoenan besar poen ada doedoek pembesar-pembesar dari berbagi kaoem, jang masing-masing maoe mengoentoengin dan menoeloeng pada kawannja sendiri, dengen tiada sekali perdoeli, apa dengen begitoe oeroesan negri jang penting boleh mendjadi telantar atawa tiada.
