264
Pengaroenja imam Raschid.
Albanie jang beragama Christen; marika ini tiada soeka kenal pada imam Raschid, maski boeat kekwasa’an apa djoega, tapi iaorang kepaksa aken toeroet pada orang-orang peroesoehan, sebab dipikir aken dapet kamerdika’an dan dalem oeroesan ini adalah pikirannja orang Moslim dan orang Christen di itoe tempat ada sama sadja.
Itoe orang orang Christen di Albanie telah menjataken, iaorang soeka berdami sama gouverneur Toerki, djika pendoedoek di Arnau‘lik dikasi hak sama rata dalem oeroesan negri dan diangkat satoe gouverneur dari orang Skipi sendiri, jang moesti djaga, soepaja Baginda Sultan tiada moengkir djandji. Seandenja ditoeroet ini perminta’an, itoe orang-orang Christen nanti poelang ka tempatnja dan tiada berboeat tjidra apa-apa lagi.
Setelah ditrima soeratnja Mohamed Ali pacha, di mana ada diminta oeroes ini perselesehan dengen djalan dami, dengen tiada diganggoe haknja orang Skipi, itoe waktoe ada banjak bei dan kapitan (kapala dari orang Christen di Albanie, sebagimana bei dari kaoem Moslim) soeda minta ditimbang segala perdjandjian jang dikasi oleh gouverneur, soepaja tiada oesa disiasiaken djiwanja orang Moslim, jang lebi baek digoenaken aken bertaroeng pada orang Oostenrijk.
Di satoe lapangan, tiada djaoe dari Djakowa, kapala-kapala dari orang Skipi maoe bikin satoe perhimpoenan besar. Dari sana sini telah dateng kapala-kapala rahajat negri, semoea ada bawa.
