— 109 —
Bagian XIV.
Sepegimana di Tjiandjoer begitoe poen di Bandoeng sekarang ada toeroen oedjan.
Semoea daja boeat menjega aer oedjan, seperti kap kreta dan laen-laen telah di goenaken en tida lama lagi park en djalanan semoea keliatannja sepi. ENG TJAIJ balik lagi ke waroengnja, di mana baroe sadja ia sampe soeda di serahken satoe telegram. Tjepet-tjepet ia batja itoe pekabaran en lantes sadja ia lompat ke djalan besar di mana ia tahan satoe sado njang kebetoelan liwat.
„Ke station!” berkata ia sembari lompat ke dalem; „dubbel akoe kasi kau kaloe bisa soesoel kreta njang maoe brangkat!”
Boeat di dalem tempo seperti ENG TJAIJ berada sekarang, krapak-kroepoekan djoega sebetoelnja tida mendjadi apa, en malahan sering bantoe sedikit, meloepaken pikiran njang iboek. Begitoelah djoega ENG TJAIJ baroe legahan rasanja setempo ia soeda doedoek di spoor njang aken bawa padanja poelang.
Di sepandjang djalan ia kebingoengan tida kroean, maskipoen bebrapa kandaran ia soeda dapet liwatin. Ia bergoemeteren mendjadi oering-oeringan setempo koeda moelain nakal, kerna itoe pikiran slempang ketinggalan, slaloe penoeken otaknja sadja. Sekarang semoea kekwatiran itoe soeda ada di samping, en menjender ia di mana
