— 117 —
siapa dari siang sampe malem tida mengenal tjape. Ia slaloe girang meliat sang anak poenja roepa njang terang sadja.
Sedari masi di empo-empo, HOK OEN soeda kliatannja bengal. Apa lagi di tempo ia baroe moelain bladjar djalan; maskipoen djato berkali- kali, toch ia tida menangis en malahan soengkan, di deketin oleh baboenja. Menginget ke tempo anaknja moelain toentoet pengidoepannja, berbajang lah di depan ENG TJAIJ roepa istrinja njang ia amat tjinta. Dan meliat itoe ia djadi inget djoega njang brapatah istrinja poenja bangga atas klakoean sang anak itoe njang moengil srenta tjerdik, en toendoek kemoedian aken bersoekoer pada Allah njang TJIONG NIO (istrinja) tida moesti alamken ini tempo. Apa lagi ia inget pegimana istrinja sebagi iboe sringkali tahan hati kwatirnja, soepaia asal sadja sang anak bisa bergirang en tida dapet ganggoean di dalem perboeatannja. Djoega itoe soeara sekarang ia mendjadi inget lagi, O itoe soeara dari sang anak, njang masi pagi sekali soeda terdenger dari djendela kamarnja njang masi terkoentji sembari memanggil istrinja: „Iboe, iboe, apatah akoe boleh kloear?”
„Ah hatikoe ― masi terlaloe pagi en dingin sekali. Toenggoe sadja sedentaran lagi” adalah djawabannja sang iboe.
„Och iboe! di dalem rasanja panas; boleh dong akoe kloear ja?”
Apatah sang anak perna djalan, seperti njang laen atawa diam sadja boeat sementara waktoe? ENG TJAIJ blon perna meliat itoe en djika anaknja
