— 118 —
ada di loear, tida laen ia ketemoeken njang anak itoe sedeng lelarian atawa lompat-lompatan.
Lagi-lagi ia pikirin anaknja sadja, njang sekarang tjelentang di bangkoe dengen roepanja njang poetjet srenta badannja njang tida berkoetik.
„Kaloe anakkoe ― anakkoe slamanja moesti begitoe sadja, ah Allah, manatah tida lebi baek ambil djiwanja sadja,“ mengata ENG TJAIJ njang kliatannja seperti poetoes pengarepan.
Plahan sekali ia masoek lagi ke dalem. Di deket pintoe ia di kabarken oleh ISAH, njang anaknja soeda inget lagi en baroesan mengomong. Tjepet-tjepet en dengen tida bersoeara ia lari ke kamar anaknja, tetapi di pintoe apa maoe ia ketemoe Dokter, njang bilangin padanja aken terlebi baek djangan liat HOK OEN doeloe.
„Djangan ke sana doeloe,” berkata Dokter, sembari toetoep pintoe, „sekarang ia rasanja bingoeng en takoet boeat ketemoeken kau.”
„Apatah ia inget apa njang soeda kedjadian ?”
„Ja, akoe rasa begitoe, kerna permoela ia brasa heran moesti tidoer di kamar depan, tetapi kemoedian plahan-plahan ia djadi inget apa njang soeda terdjadi. Maka poen sedari ia inget itoe ketjilakahan, ia mendjadi bingoeng en menanja berkali-kali dari keadahan adenja. En lantaran itoelah akoe rasa njang kau nanti bikin kaget en takoet padanja: Apatah tida begitoe toean LIM? Toean tentoe ada lebi taoe.”
„Di tempo blakangan akoe kepaksa moesti sringkali gégèrin padanja, lantaran ia maoe bikin adenja tjilaka sadja, pepergian atawa memaen di
