— 137 —
kamar, di mana ba HOK OEN perna taro en tentoe loepa, kerna ia ada niatan maoe tanem itoe di kebonnja.”
ENG TJAIJ tida kata apa-apa, ia bongkokin badan lagi, menjioem poela sang anak en berbisik kemoedian: „Djangan bikin ia bangoen; ia moesti tidoer biar kenjang.”
Sesoedanja ia berlaloe dari itoe kamar en selagi berdjalan kedepanin, apa maoc ia inget apa njang HOK OEN perna mengomong doeloean pada adenja setempo ia ada di depan sawah en maoe balik poelang. Begitoelah djoega ia oepamaken itoe padi njang masi idjo seperti itoe pengidoepan njang masi moeda, doea-doeanja dengen sanget mendadak di tjaboet dari tanah.
Setempo ia ketemoe Dokter di gang, ia tjeritahken apa njang itoe toean-toean dari Bandoeng poenja pendapetan, en minta kemoedian pertoeloengannja boeat oewarken itoe kabar di sedalem roemanja. Ia sendiri tida sanggoep lakoeken itoe.
Sesampenja di kamar depan, ia ketemoeken anaknja njang setenga mati lagi sedeng tidoer; tida satoe hal membikin ia loepa dari ingetannja baroesan, djadinja itoe kedjadian di mana sawah padi berbajang sadja di depan matanja. Ia liat en rasanja denger semoea itoe sera njata, Lagi-lagi ia liat HOK OEN naek di gili-gili srenta memegang segoeloengan padi, en GOAN OEN lagi Sedeng mengawasin sadja.
Kesoedahannja ia rasanja tida sanggoep en moelain berdjalan moendar-mandir boeat djangan terlaloe mikirin itoe sadja.
