— 144 —
Sampe di sini lah ia toetoep matanja njang berat.
ENG TJAIJ bengong seperti kesima. Ia pikirin njang soeda-soeda, setempo istrinja sering mengomong padanja, njang HOK OEN poen ada mempoenjai „hati menjinta" seperti GOAN OEN, en ia tida maoe pertjaia pada itoe; ia pikirin itoe pertanggoengan tjara pegimana orang moesti piara anak-anaknja en itoe keperloean boeat ikoetin tjara dajanja aken bisa mengarti adat lembaganja, en dengen sedi ia inget pada TJIONG NIO, njang djika masi hidoep, soeda tentoe anak-anaknja dapet tilikan terlebi sampoerna.
Ia poenja hati tida lemah en begitoe poen tjela semoea hal njang ia soeda iboekin, kerna satoe orang lelaki teritoeng kebanjakan di golongan dagang, en anak bininja tida boleh menjoekarken boeat ia lakoeken kewadjibannja, tetapi toch ia mengakoe sendirinja, njang ia soeda kesasar, njang ia rasahken soeda poeas sadja, djika meliat anak-anaknja waras en bergirang, zonder menilik padanja terlebi djaoe, en dari itoe semoea hal masi tinggal glap bagi dirinja, sampe perkatahan anaknja sendiri membikin ia mendjadi sedar. Dengen penoe kekagoeman ia awasin sang anak njang begitoe moerah hatinja srenta bisa tahan sabar aken meliat soedaranja di lebihken en satoe prangsahan telah timboel di hatinja, satoe prangsahan njang kira-kira membilang: „Ah dasarnja akoe poenja proentoengan.“
Ia rasahken, pegimana gampang laen orang lantaran itoe, bisa djadi mengiri, koerang senang
