— 147 —
Taoe di mana, akoe masi ada poenja doeit sepitjis, kasi itoe pada si SIDIN di pasar en bilang padanja, njang akoe brasa lebi kasian padanja dari njang soeda-soeda. En apatah ada seorang njang nanti maoe piara akoe poenja perkoetoet? Akoe taoe njang kau semoea bentji lantaran ia galak en djelek, tetapi ah! rawatin padanja biar baek kaloe boleh, kerna ia tida mempoenjai temen lagi selaennja akoe, njang kepaksa moesti tinggal padanja.
Brengkali ada baekan djika boeroeng itoe dikasi pada si SIDIN, kerna ia tentoe sampe mengarti pegimana sangsara sebetoelnja moesti hidoep dengen badan loempoeh en setiap hari tida bisa berboeat laen dari doedoek sadja. Akoe poenja poehoen kembang di kamar ada boeat si RIMA. Poehoen itoe perloe dengen banjak aer. Satoe hari akoe sirem ia anem kali. Tapi kliatannja lajoe sadja, brengkali akoe terlaloe sering sirem padanja. RIMA tentoe ada lebi mengarti. Nah, sekarang akoe rasa soeda tjoekoep. Slamat tinggal pada sekalian.
Apatah kau soeda toelis: Slamat tinggal pada sekalian ?” menanja NOK OEN seperti orang maoe ketinggalan kapal.
„Soeda,” menjaoet ENG TJAIJ njang pertjoema tjoba tetepin soearanja. „Akoe soeda toelis. Apa kau masi maoe tambaken apa-apa lagi?’
„Apatah orang boeboeken tanda tanganja, pa? Apatah akoe masi bisa boeat toelis itoe ?”
„Akoe rasa tida,” berkata sang ajah sedikit goegoep, „tetapi biar akoe njang boeboeken.”
„Semoeanja dong pa, ja: HOK OEN en she-nja.”
