— 150 —
Bagian XVIII.
Bagoes srenta bersi adanja hari njang di tentoeken boeat merajaken pesta, tetapi di lapang-lapangan en sawah-sawah hari itoe tida njang samboet dengen kegoembirahan.
Bendera-benderahan en tetarep srenta padjangannja telah di bongkar dan di simpen lagi. MINA, anak boedjang tetangganja ENG TJAIJ, dengen menarik napas simpen badjoe koeningnja njang ia bli di pasar meloeloe boeat di pake di itoe pesta. Di sana-sini bilangan itoe kampoeng orang sedeng rame menjeritahken hal penjakit anaknja ENG TJAIJ.
Iboe-iboe dengen tjape-hati sekarang djaga soepaja anak-anaknja slaloe ada di depan matanja. Semoea di bilangan ENG TJAJ tinggal, orang toeroet berdocka boeat satoe djiwa moeda, njang sigra melajang ke laen doenia.
Semoea pada diam, djika inget itoe roepa njang berijajah en itoe soeara garing, njang ia masing-masing tida bakalan liat en denger lagi.
HOK OEN poenja badan kliatannja njata semingkin koeroes; sepegimana satoe plita njang seblonnja padem mendjilat-djilat doeloe, begitoe poen adanja HOK OEN, kerna sesoeda tida inget apa-apa lagi boeat bebrapa hari, bisa lah ia sekarang mengomong seperti biasa.
„Apatah artinja ?" menanja ia seringkali papanja, kapan ia melekin matanja.
