— 163 —
Bagian XX (Penoetoep).
„Akoe tida sanggoep mendenger soeara itoe," berkata ENG TJAIJ,„angkat klamboenja."
Mata hari njang maoe silem, seblonnja semboeniken tjahajanja, terangken sekiter kota Tjiandjoer en boeang sinarnja ke segala ploksok-ploksok, njang sampe di ini tempo ada mendjadi kesenangannja sang anak.
Kambing-kambing, lapangan-lapangan poen telah di sorotken en begitoe djoega boeroeng-boeroeng, njang HOK OEN kenal dari masi baroe bladjar terbang dan rimba-rimba en kebon-kebon njang zonder adanja ia, tentoe rasahken teramat kesepian, tetapi mata hari itoe roepanja simpen sinarnja njang mengkrèdèp boeat kedoea soedara itoe, kerna setempo klamboe baroe sadja di angkat, apa maoe ia lempar sinarnja njang begitoe silo ke dalem kamar, sampe matanja sang ajah kepaksa moesti di meremken en ia baroe bisa kenalin anak-anaknja lagi sesoedanja berselang lama djoega.
Di sitoelah sekarang terliat doea soedara itoe reba sembari memelok satoe pada laen en di sorotken oleh mata hari njang maoe silem.
Plahan sekali ia saling menjioem en tangannja masing-masing mengoesap kepala soedaranja. Melongok anak-anaknja, ENG TJAIJ dapet kenjatahan njang HOK OEN poenja aer moeka kliatannja amat bersedi.
