— 18 —
moelain ngebanjol. „Itoe toch njang nanti membikin kau dan GOAN OEN mendjadi girang boekan?“
„Ja ja!“ mendjerit HOK OEN setelah ia lompat dari krosinja en dansa-dansa di sekiter kamar itoe „O papa, apatah moe maoe idjinken akoe srenta GOAN OEN boeat toeroen kebawa dan meliat orang-orang itoe?“
„Boeat boleh bermakan sama-sama, itoelah akoe tida bisa loeloesken,“ menjaoet ENG TJAIJ,„Anak-anak ketjil kaloe di waktoe-waktoe begitoe selaloe bikin orang kikoek sadja; tetapi kau boleh masoek di kamar boeat meliat.“
Djoestroe HOK OEN lagi sedeng asik mengomong apa maoe ISAH njang tida di oendang kasi liat roepanja en kasi denger soearanja njang selamanja di bentji oleh kedoea anak itoe: „Ba HOK OEN, ba GOAN! soeda malem en waktoenja tidoer!“
„Dengen oga-ogahan kedoea anak itoe mendenger kata, kerna ia lagi sedeng enaknja memasang omong, en HOK OEN brengkali ada maoe membikin sembilan poeloe sembilan pertanjahan dari perkatahan soedagar.“
Diam sekali ia berdjalan ke loteng setelah ISAH giring padanja en njang mana kepengen soepaia anak-anak djalan doeloean, kerna slempang njang botja-botja itoe di blakangnja nanti mendapet liat apa-apa en moelain berlakoe loear biasa.
Ini malem sebetoelnja hati anak-anak itoe brasa terlaloe ketarik oleh „orang-orang boeas dari hoetan“ sampe ia tida pikir laen dari kedatengan itoe hari, di tempo mana ia bakal ketemoe pada
