— 21 —
Bagian II.
Di hari besoknja ENG TJAIJ bangoen laat sekali. HOK OEN keliatan soeda rapi sekali sedengan GOAN OEN lagi di toekarin badjoe oleh si ISAH, boedjang mana soeda di pesen njang madjikannja hendak adjak djalan-djalan kedoea poetranja.
„ISAH,” menanja HOK OEN seperti orang njang habis sabarnja. „Masatah papa begini waktoe belon bangoen ?”
„Boeat apa si ngebohong. Oentoeng apa djoega kaga,” menjaoet ISAH dengen pendek. „Kaloe tida pertjaja preksa sadja sendiri,” meneroesken ISAH penjaoetannja.
Inilah troesa sampe di bilang doea kali, kerna HOK OEN soeda lantes sadja djalan ke kamar tidoer papanja en sekarang lagi tempel koepingnja di mana pintoe kamar. Ia denger soeara tindakan dari dalem en berbareng dengen itoe GOAN OEN poen keliatannja soeda rapi en sampe padanja.
„Ssssst,” mengata HOK OEN tida tahan toetoep moeloetnja lebi lama lagi en lantes sadja menanja dari loear.
„Pa, apatah papa soeda ampir abisan mandi? Apatah papa sekarang lagi sedeng saboenin moeka? Apatah sekarang papa lagi bikin ? Papa lagi tjoetji badan, pa ? O, papa lagi maen aer.
